يـآ صـآحـبـي يـآ آغـلـى رفـيـق ب’عآلـمـي كـلـه ""

13-02-2010, 07:20 AM

يـآ صـآحـبـي يـآ آغـلـى رفـيـق ب’عآلـمـي كـلـه ""

[FONT=Arial]

السلام عليكم

كلنا مر علينا صداقات كثيرة بحياتنا

بعضها انتهت وبعضها الى الآن مستمرة

لكن كيف نقدر نحافظ على صداقاتنا ؟؟

وكيف نختار صديقة كويسة ؟؟ [/font]

13-02-2010, 07:23 AM

لا تحسبين انه اذا صار خلاف بينكم ، هذا معناه انها خلاص مو صديقتك !!
مشكلة الانسان انه يحسب نفسه ملاك معصوم من الخطأ
وانه اذا صارتله مشكلة مع أحد ، بدون تردد يوجه اصبع الاتهام للطرف الثاني
ومايفكر ان الغلط ممكن يكون منه !!
انتبهي تتهمين صديقتك بدون ماتسمعين السالفة من جهتها
فكري بينك وبين نفسك انه فيه احتمال تكونين غلطتي بحقها !
لا تدافعين عن نفسك وتطلعين لك اعذار
لأننا لو بنقعد على هالحال عمر السالفة ماراح تخلص !
الهدف مو أنك تبرئين نفسك أو تبرئينها

حتى لو كانت هي الغلطانة مو مشكلة ترا
الهدف انك تلاقين في نفسك رغبة انك تسامحينها وتبدين صفحة جديدة
عاتبيها عادي من حقك .. بس اختاري كلماتك زين ولاتجرحينها
بس انتبهي .. فيه خط أحمر بين الطيبة والمسامحة ، وبين السذاجة والغباء

لا تسمحين لنفسك تصيرين ملطشة الكل يجرحك ويخطي في حقك
خليك متسامحة ، بس بحدود
أعرف بنت من كثر ماهي متسامحة وطيبة ، راحت مكانتها عند صديقاتها
صاروا يتمسخرون عليها ولايحسون بالذنب

ماعاد صاروا يخافون على زعلها لأنها ماتزعل وتعاتب أبد

اذا صاحبتك بتسافر ، حاولي تسوين لها حفلة حتى لو صغيرة
اجتمعوا كل صاحباتك وودعوها
فيه ناس كثير يتفادون الوداع ويحسون انه صعب عليهم
وهو بالعكس ، الصعوبة مو بالوداع نفسه
الصعوبة بالشي اللي بعده ، لما يروح الشخص اللي ودعيته
ولما تودعينها تحسين انه عندك الفرصة انك تقولين لها اللي بخاطرك وتضمينها وتشبعين منها
وهالحفلة الصغيرة بتظل في ذاكرتها طول فترة غيابها
الشي الثاني انها اذا سافرت لاتضغطون عليها
لا تحسسونها انكم صاحباتها وبس
قولوها تصادق بنات هناك وتتعرف عالمكان وتحبه
اذا اتصلتوا عليها او كلمتوها بالماسنجر او أي شي
لا تنكدون عليها وحسسوها ان هالتغيير شي حلو وايجابي
ولا تتضايقين اذا صارت قريبة لصاحباتها الجدد أكثر منك
لأن البعيد عن العين بعيد عن القلب

لاتخلينها تبعد عنهم لأنه لمصلحتها تصير مختلطة بمجتمعها الجديد أكثر من القديم

اذا وصلك كلام ان صديقتك عندها مشاكل
اصحي تتدخلين او تحلين المشكلة لها
او حتى تكلمينها عن السالفة
اذا هي ماقالتلك بنفسها معناته انها ماتبيك تدرين
فـ احترمي رغبتها
أما اذا قالتلك عن هالشي
لا تضغطين على نفسك كثير وتحاولين تحلين لها المشكلة
أحيانا يكفي مجرد استماعك لها ووقوفك معها
و حسسيها ان الوضع بيصير اوكي
وانها ازمة وتعدي
لأنك ماتدرين قد ايش هي محتاجة تسمع كلام يهديها
وغير كذا اذا المشكلة بينها وبين بنت ثانية
شي حلو انك تحاولين تصالحينهم
أما اذا هذيك من جد غلطت بحق صديقتك وطعنتها بظهرها
أكيد لازم توقفين مع صديقتك وتدافعين عنها
شعور رائع لما تحس ان عندها سند
وصديقات يعتمد عليهم
أما اذا كانت المشكلة عائلية
تقدرين تستشيرين أمك بدون ماتقولين لها اسم البنت
أمك دائما تكون فاهمة بهالامور اكثر منك
خذي منها كلام حلو وحلول تقولينها لصاحبتك
وأهم شي ادعيلها دايما وذكريها تكون قريبة من ربها
عشان يكون قريب منها وقت مشكلتها ويساعدها فيها

13-02-2010, 07:26 AM

الهدية دايما أفضل وسيلة للتعبير عن المحبة
لاتهتمين بسعر الهدية ، أهم شي قيمتها المعنوية
حتى لو بدون مناسبة
يكفي انه يكون عندها شي بغرفتها منك
اذا شافته تتبسم وتتذكرك
احيانا اشياء بسيطة ممكن تخلي الصداقة اقوى وأقرب
بس عاد مو كل شوي تروحين توزعين هدايا ع البنات
يعني من فترة لفترة
وبما اننا نتكلم عن الهدايا
حابة أقول كلمتين مهمة كثير
أفضل هدية ممكن تعطينها لصديقتك هي هدية تنفعها يوم القيامة
اذا شفتي منها غلط او معصية
نبهيها قوليلها تتركها ، ذكريها بالاخرة وحثيها على الخير
قوليلها تنتبه لصلاتها ولاتفوتها
وحواجبها لا تلعب فيهم
الله يهدينا وياكم يارب

الاعتذار
مثل ماقلتلكم فوق
مافيه أحد كامل وكلنا نغلط
اذا حسيتي انك غلطتي بحق صديقتك لازم تعتذرين لها
بدال ماتطلعين لك اعذار تدافعين فيها عن نفسك
طيب كيف نعتذر بطريقة حلوة ؟
اول شي تأكدي انكم كلكم على الـ same page
يعني لازم مايكون فيه مبهم بالسالفة
شي هي ماتدري عنه
أو هي مو فاهمة السالفة من الاساس
أو انتي مو عارفة هي ليش زعلانة بالأصل ؟
كل هالامور لازم توضحينها قبل تعتذرين
غير كذا خليك صادقة باعتذارك
مو كلمتين والسلام !
حسسيها بقيمتها عندك وانه مايهون عليك زعلها
وبعد حددي الشي اللي محسسك بالذنب
مثلا تهاوشتي معاها وقلتيلها كلام قاسي حبتين
قوليلها اكثر شي ضايقني اني قلتلك كيت وكيت
و أني وصفتك بكلمة كذا
و أهم أهم شي انك توعدينها مايتكرر هالشي مرة ثانية
لأنه وش فايدة الاعتذار دامك بترجعين تعيدينها بكل وساعة وجه

الغيبة ( الحش )
شي قبيح ومذموم وبشهادة الجميع
بس للأسف مو كل شي مذموم نقدر نتركه بسهولة !
أسوأ شي لما ترمين صداقاتك الحلوة بالزبالة
بس عشانك طفشانة وناويتها حش ؟
والله يابنات ماتسوى عليكم تروح حسناتكم وتروح ثقة الناس فيكم وتروح مبادئكم
عشان كم دقيقة اغتبتي فيها فلانة وسبيتي فلانة وضحكتي على فلانة
والأسوأ اذا كانت صديقتك وتتكلمين فيها من ورا ظهرها وهي ماتدري
والرسول اللهم صلي وسلم عليه قال ( من رد عن عرض أخيه رد الله عن وجهه النار يوم القيامة )
لما تكونين مع بنات يحشون بوحدة
لا تسكتينهم بطريقة همجية
بالعكس أمدحيها عندهم ودافعي عنها
قولي حرام عليكم فلانة حبوبة وتجنن سواليفها ومن هالحكي
واذا عارضوك وكملوا حشهم
قوليلهم انه حرام وانه مايسوى عليهم تروح حسناتهم عشان هالكلمتين

13-02-2010, 07:28 AM

وبالنهاية صح ماعندي خاتمة صاحية

بس هذي كم جملة تساعدنا عشان نبدا كلام مع شخص مانمون عليه

ومع الوقت تجرك السواليف وتصيرون اصحاب

- كيف كانت عطلتك الاسبوعة ؟

- الجو جميل هذا اليوم

- يبدو انها ستمطر !

- الشوارع مزدحمة هذا الصباح

- ماآخر فيلم شاهدتيه ؟

- هل اكلاتك المفضلة نباتية أم لا ؟

- هل شاهدتي الايميل الذي أرسلته لك البارحة ؟

- أحببت تسريحة شعرك هذا اليوم ! تبدين جميلة

- من اين اشتريت حذائك ؟ يبدو انيقا ؟

- هل تواجهين صعوبة بالدراسة هذه السنة ؟

وبس سلامتكم

يارب الموضوع اعجبكم

بحفظ الله

13-02-2010, 02:40 PM

موضوع رائع رمانه

وفعلا صار الموضوع هذا صعب بها الزمن

أدوات الموضوع
عرض نسخة للطبع أرسل هذا الموضوع إلى صديق
أنماط العرض
النمط الخطي الانتقال إلى النمط المختلط الانتقال إلى النمط الموضوعي

إعلانات نصية :
تويتر - twitter	فيسبوك - facebook	العاب ضمى نجد
يوتيوب ضمى نجد	جالري ضمى نجد	شات ضمى نجد الصوتي