ََآخرتها معك يادنياَََ

04-06-2010, 08:42 PM

~بنت نعمه وشايفه خير ومتربيه على عزي ***ولي شيمه ولي قيمه واعز النفس واكرمها

أحب الصعب والكايد والله ميسر امري *** وعلى عنادي أحب اني أساير نفسي وأطربها

أحب الطيب وأحب الجود وأحب أتلذذ بصبري *** ولادنيت انا نفسي على الدنيا وبلاويها

عزيزه نفسي واطباعي على ابوي وعلى جدي **** شموخي بكلمتي وفعلي والكلمه ماأثنيها

04-06-2010, 08:47 PM

اليوم لك ثانـي مـع راحـة البـال
وانا بعـد همـي لـه اليـوم ثانـي..

اليـوم تاركنـي اناظـر بـالاطـلال
صورة,, رساله ,,حلم ,,جرح واماني !

ليلي قضيتـه بيـن هـمٍ وغربـال
واقول في نفسي حبيبـي نسانـي!!

غنيت انا عقبك من الضيـق مـوال
يومك تسمـع للطـرب والاغانـي!!..

لي دمعةٍ من فوق الاوجـان تختـال
يومـك تلاعـب مترفـات المبانـي..

وبي عبرة منهـا المخاليـق تهتـال
ياعبرتـي لاتفضحينـي عشـانـي! :

ياعبرتي خلي لـك الصـدر منـزال
لاهوب بـك داري ولاهـوب عانـي!!

مشغول له في ترفة حالهـا حـال
ماهوب فاضـي لعبرتـي او جنانـي!!

في يوم واحد نستـه كـل الامـال!!
وش عاد لو يدري بشـوق غشانـي؟؟

ماهوب مثل اول هذاك الغـلا زال!!
عزاه كيـف الـود زال بثوانـي؟؟؟؟؟؟

اربع سنينٍ طوال ياكيف تنـزال؟؟
وتحط في قلبك هنـوف مكانـي؟؟!!..

ماكنت اظنك تجحـد الـود لا طـال!
اثرك على طريـف وتبينـي اعانـي!

قد قالـوا ان البعـد والصـد قتـال
وانـا اشهـد انـه علـة بالمحانـي!!

يومي اشوفك لابس بشت وعقال!!!!
والشارب الاسـود وزول سبانـي..

وعروستك من الحيا ترخـي الشـال
وترسل لها بسمـه تزيـد امتحانـي

دمعي بلا علمي على وجنتي سـال!!!!
اشتقت لـك ليتـك تحـس بحنانـي..

ليتك تشوف الحال يامتلـف الحـال!!
بس التفت لي شـوف شالله بلانـي..

نصيتها تضحـك لهـا لاهـيٍ سـال،،
واقـول ياليتـه حبيبـي نصانـي!! :

(الله يادنيـا التعاسـه والاهــوال،،
الله يستر وش يخبـي زمانـي..

غلطانه اللـي تعشـق اليـوم رجـال:
مهما حلـف بالـود يبقـى انانـي..

وقلب الرجل مابه من الحـب مثقـال!!
والبنـت ترفـه قلبـهـا مايـدانـي :

حاولت اعبر والقلم في يـدي مـال،،
من هول مابي انعقـد بـي لسانـي

04-06-2010, 08:55 PM

بعد المحبه , علامك منت طايقني ؟
وانا على خبرك أشواقي هي أشواقي

اسلوبك اليـوم يقتلنـي ويحرقنـي
سؤال ؟ ابسألك وين اسلوبك الراقي !

حتى كلامك معـي بلحيـل مقلقنـي
والشك في داخلـي ماعـاد ينطاقـي

ان كان قصدك تقول إرحل وفارقني !
برحل ولكن مصيـر الحـي متلاقـي

وان كان قصدك تغلا وانت عاشقني ؟
ابشـرك ماتغيـر شـي بعمـاقـي

وان كنت تمزح ؟ أمانه معك روقني

ياليتك تحس بحسـاس ٍ مضايقنـي
حلمك من أول ! في هالدنيـا تحققنـي

واليوم في بحر غدرك ناوي اغراقي !
والحظ الاقشر يوم إنه فيـك علقنـي

خلاني دايم على شوفتـك مشتاقـي
علمتني كيف ( أحبـك ) لاتوهقنـي

علمني ( أنسى ) ولا تستكثر الباقـي
كنت احسب إنك اذا جيتـك تعانقنـي

"أثريك لا طايق ٍ شوفي ولا عناقـي

04-06-2010, 08:57 PM

ودِّي أمُـوتْ .. اليُـوم ... وأعيـش باكـر
وأشوفْ مِنْهـو .. بعـد مُوتـي فقدنـي ..!

ومِنْهو حَمَلْني لِيـن .. ذِيـكْ .. " المقابـر"
وأشْكـرْ أنـا .. كِـل مِـنْ كَرَمْنـي ودِفنِّـي

وبشُوفْ .. يرثيني أنـا كَـمْ [ شاعـر ] ..؟
ومِنْهو تركْنـي .. ومـا كِتَـب شَـي عنِّـي

شِخصٍ تعنَّـى لـي .. مـع إنـه .. مسافـر
وشِخـصٍ قِريـبٍ .. وآنـا مَيِّـت / طعنِّـي

وشِخصٍ يمثِّل دمعِتَـه .. مـا هـو قـادر !
وشِخصٍ تِطيـح دموعـه كِـلْ مـا ذكرنـي

ومِنْهو مِـنْ أهلـي ف العَـزا كـان حاضـر
ومِنْهو دعى لي فـي " صلاتـه " ورحمنـي

ومِنْهـو بنـى [ بإسمـي ] سبيـل ومنابـر
ومِنْهـو يفـز قلبـه .. إلا مِــنْ لمحـنـي

ومِنْهو عشانـي : طُـول الأيـام ساهـر ..!
ومِنْهـو ثـلاث أيَّـام .. راح وتركنـي ..؟

ومِنْهـو يرتِّـب .. غرفتـي .. / والدفاتـر
وإن شاف ( صوره ) لـي صاح وحضنِّـي

يالله عسـى .. مـا تغفـى كـل المشاعـر
ويالله عسـى .. مـا ينصِـدِم يُـوم ظـنِّـي

خايـف يـروح العُمْـر .. وأكُـونْ خاسـر
وإن طـار طيـري .. مـا يفيـد / التمنِّـي

وخايـف يجينـي وقـت : أكْسِـر خواطـر
إن دارت الدنـيـا .. وزمـانـي كسـرنـي

ومـدام هـذي الدنيـا .. صـارت مظاهـر
وكِـلْ مَـنْ علـى كيفـه .. وجَـوَّه يغنـي

الضيـق وافـي .. والحـزن حيـل وافــر
والجـرح أكثـر شـي .. شفتـه يحبـنـي

عايـش وميِّـت بيـن .. ماضـي وحاضـر
والصبـر [ مفتـاح الفـرج ] ضـاع منِّـي

قل وش تبـي وتتركنـي يـا حزنـي آمـر
مسكيـن فرحـي / تصـدِّق إنَّ وحشنـي !!

( شاعـر ) ولكنِّـي .. مانـي ب شـاعـر
ودِّي أمـوت اليـوم .... وأرتـاح منِّـي !!

04-06-2010, 09:03 PM

جوابي العادي لسؤالك المعتاد...
تبي تعرف وش اللي فيني...

أوقف معي لحظة...وحاول تكتب معي..
على سطور الورق..وبحروف من حبر القلم...

أكتب في أول السطر أو حتى في آخر السطر..
أنا ما فيني شي..

أنا مو بيقتلني الندم..
أنا كلي آهات وألم..

أنا في نهاري..جروح قلبي تصاحبني..
وفي ليلي..الوحدة تلازمني..

أنا ما فيني شي...بس أبي كل شي..
أبي إنسان يفهمني...يستوعب مدى جرحي..

أبي حضنه يدفيني...كل ما نزلت دمعة من عيني...
أبي عينه تناظرني...وحرارة شوقه تحرقني

وأحس إني أمل روحه...ودمه اللي بعروقه..
وإني كل ما كان من عمره..

وحلمه اللي عايشٍ لأجله..
وأحس إني عالمه كله..

وأقرب له من شرايينه..
وأكثر حتى من نبض قلبه..

أبيه يحبني لذاتي..ويعشق حتى نظراتي..
ويموت..يموت بهمساتي..

أبي لا جيت له أمشي..
يجري شوقه يحضني..ويسابقه حبه..

بعد كل هذا تسألني..وش فيني..؟!!
أنا ما أبيك تسألني...أنا أبيك تفهمني..

تعبـــــــــــــــــــــت..

تعبت من الأسئلة..وتعبت أكثر من تكرار الأجوبة..

أنا ما أبي أسمع إلا كلمة...
كلمة ترد الروح فيني وتنسيني جروحي....

أنا ما فيني شــــــــي..
بس أبيك تحس فيني..

أدوات الموضوع
عرض نسخة للطبع أرسل هذا الموضوع إلى صديق
أنماط العرض
النمط الخطي الانتقال إلى النمط المختلط الانتقال إلى النمط الموضوعي

إعلانات نصية :
تويتر - twitter	فيسبوك - facebook	العاب ضمى نجد
يوتيوب ضمى نجد	جالري ضمى نجد	شات ضمى نجد الصوتي