أسطورة سي السيد ! هل صنعتها المرأه ؟

14-01-2012, 04:50 PM

أسطورة سي السيد ! هل صنعتها المرأه ؟

مساء الفل ~

فكرة الموضوع أثارها مشهد حضرته في آحد المحلات ..
وكان المشهد عباره عن زوج وزوجته في محل ملابس نسائيه ..
الزوج واقف وفارد صدره وفي يدة قطعه
ملابس اعجبت زوجته .. والزوجه واقفه وراه وتنغز بظهرة تقول ( قله بكم قله بكم ) ..
استوقفني المشهد بصراحه .. وبيني وبينكم ضحكني شوي
واستغربت منها .. يعني لية هو يقول بكم ؟ لية يعني مالها لسان ؟
وين المشكله لما تسأل وتشتري وزوجها معها؟ .. ليه هو اللي يتكلم بلسانها ..
يمكن تقولون حيا ,, بس مافيها شي .. هي ماراح تدق حنك ولا تسولف
والنساء في عهد الرسول علية الصلاة والسلام كانوا يبيعون ويشترون
ومحد أنكر عليهم .. طالما المرأة محتشمه وماخضعت بالقول ..
لية المرأة تلغي شخصيتها حتى لمجرد السؤال ؟؟
مع العلم أني من انصار تأنيث كل محلات المستلزمات النسائيه ..
حتى الوحدة تاخذ راحتها أكثر بس مو معناه أني ماأسأل عن السلعه
لأن اللي يبيع رجل !!
وموقف ثاني, كنت واقفه عند اشارة مرور في احد الشوارع.. وأنا أطالع يميني لفت نظري
منظر مت من الضحك عليه .. خياط نسائي وتعرفون الخياطين الرجال كيف يحطون شباك صغير
تدخلين راسك منه وتكلمين الخياط.. راس واحد مو 2 .. لأن اللي صار أن واحد وزوجته .. مدخله المسكينه راسها
تشرح للخياط وسي السيد مدخل راسه معها .. وهو ماشاء الله تبارك الله قطع XXXL ..يعني ضخم الجثه
فصاير المنظر من برا يموت ضحك .. جسمين متلاصقين من الأعلى بدون رؤوس
ليه طيب؟ هل بيفترسها الخياط مثلاً وبينه وبينها الطاوله ..؟؟
وش يبي يعني ؟
أنا ودي أن الإشارة مافتحت لين أشوف كيف بيطلعون روسهم من الفتحه ! أتوقع الباكستاني
بيصب على روسهم من زيت المكينه شوي عشان تتزحلق ونطلع ..
لإله إلا الله .. كل شي لين زاد عن حد أنقلب لضدة ..الانفلات الزايد والتمرد على الزوج موب زين
لكن الإنقياد الزائد بعد قاتل .. يخنق

النقاش ماراح يكون على هالسالفه عشان مانتشعب في الحوار
وندخل لمتاهات ..
اللي أبي أوصل له .. مين السبب في عنتريه الرجل ؟ يمكن تكون المواقف اعلاة مافيها ذيك العنتريه
اللي أعنيها لكنها لاتخلوا من إنقياد وتسلط .. لكن مين اللي حوّل الرجل لسي السيّد !! تلك الشخصيه
اللتي قرأنا عنها في روايات نجيب محفوظ , وظننا أنها أندثرت ! من السبب في انعاشها وضخ الحياه في أوصالها ؟
هال هي المرأة ؟ أم المجتمع ؟
أنا بقولكم مين من وجهه نظري : الأثنين شركاء بطريقه أو بأخرى ..
""
بعض النساء ومن البدء ولما ترزق بأولاد وبنات .. غالباً ماتعامل الذكر بطريقه
مختلفه تماماً عن معامله البنت .. ( لانعمم لكن هذا واقع اجتماعي )
وفي كثير من البيوت يحظى الصبي بمعامله مميزة لأننا في مجتمع ذكوري 100% ..
الأم تسمح للذكر بالسيطرة على مجريات الأمور في المنزل
والتحكم في مصير الأناث فيه ..وشوي شوي تنشأ لديه تلك النزعه المقيته !! ومع بعض التنمّر يتحوّل لمارد ..
يبدأ في تسليط كل المجاهر المتخلفه للتدقيق في كل تصرفات
شقيقاته .. ويبدأ بالضغط والشكوك ..
( المشكله أنه يطلع من البيت وهو منكد على اخته
عند لبس او جوال او لاب توب .. ومن يركب السيارة وهو داق حنك مع خوياته وجالس يغازل ) هنا مربط الفرس
لما عودّنا السيد ذكر على فرض القوانين ماعودناه كيف يفرضها
على نفسه قبل اخته ..
ماعودناه أن لبنات الناس حرمه كما لشقيقاته حرمه ..
دائماً مقوله الرجل ناقل عيبه والرجال مايعيبه إلا جيبه تفرسني ..
ينشأ الصبي من صغرة وهو حاس على راسه ريشه ..وأن الأنثى أقل منه ..وله حق السيطرة عليها
وأن رأيها في المرتبه الخامسه بعد رأيه ورأيه ورأيه ورأيه ..
ولما يصل لسن الزواج تكاد تلك المقولات الفاشله أن تكون قناعه راسخه في معتقداته
وأنه بالفعل ناقل عيبه .. ويبدأ يسرد قائمه الشروط في عروس المستقبل لين تصير كنها صك مزرعه
وعلى رأسها الجمال والكمال والمال طبعاً حتى تعينه على المعيشه
حتى لو كان سكير وداج مايعرف الصلاه والشكل مايحتاج
وتجلس هالأم اللي نفخته من البدايه تدوّر مقرودة الحظ .. والريبوت المستقبلي
على أحدث المواصفات لتليق بعنترها الفذ ..
لا وتزعل لين أحد رفضه .. وبعد ماتطيح في دربه المقرودة
تبدأ صراعات فرض السلطه ..وفرد العضلات ..
وعلى كل صغيرة وكبيرة يستشهد بالآيه { الرجال قواموون على النساء }
بدون مايدري وش شروط القوامه ..
""

سطوة الرجل تتجاوز كل الأعراف وكل مايتعلق بالمساواة ماهو إلا حبر على ورق يتهاوى
في أول صدام بين الجنسين !

ومن هنا بدا الخلل ..
وبدأ الصراع بين الرجل والمرأة .. لكن مين اللي رجح كفه الصراع لصالح الرجل ؟
أنثى متخاذله ألغت شخصيتها وسلمت هذا الرجل مفاتيح عقلها يغلقه متى شاء
ويفتحه متى شاء لكي يضخ أفكاره ويعيد تأهيلها حسب مايراه مناسباً لها ..
موضوعي ليس دعوة للتمرد على الرجل ..
على العكس .. أنا من أكثر الناصحين لإحترام الزوج ..
لكن احترامه شئ .. ومسخ شخصيتي شئ ثاني تماماً
هناك شعرة دقيقه بين وبين ..
احترامك للرجل لايعني أنكِ غير قادرة على إداره شؤونك ,
ولايعني سيطرته على كل ماتقولين ولا برمجه افكارك . ولا التدخل في قراراتك الشخصيه بدون مبرر ..
بعض الرجال لايرى بأساً من التلصص على خصوصيات زوجته
والعبث بهاتفها ومحتويات حقيبتها دون علمها ..
""
حلو يكون بينكم ثقه متبادله واجهزتكم بدون باسوورد لكن كل شخص
مايتعدى مساحه الآخر .. بدون مايسمح له

حلو يكون لكل زوج وزوجه حدود يقف عندها .. ويكون لكلُ منهم بعض الخصوصيه
مو مثل بعض الزوجات من تدخل على بيت زوجها عروس وهي فاله علية كل شريط
حياتها وكل اسرار ماضيها واسرار افراد اسرتها ..
قبل حتى تملى يدها من زوجها وهل هو جدير بالثقه أو لا
(تسمع بالصراحه الله يجزاها خير )
اسرار اسرتك ليست ملكك لتشيعيها .. وزوجك مو المفروض يطلع على خصوصياتهم .. بكرة لو صار بينكم اي شي جلس يعايرك فيها
يالله عاد حليها ..
""
لما تخلين زوجك المتحدث الرسمي عنك .. في كل محفل ومكان
وانتي تنغزين بظهرة عشان يتكلم عنك .
ولما تخلينه هو اللي يقرر عنك كل شئ .. حتى لو كنتي موظفه
وهو اللي يستلم راتبك ( كثير يسوونها ).
ولماتسحب من يدك كل الصلاحيات والإختيارات والقرارات وتصبحين مجرد
وعاء يمشي على الأرض متى مابغاك عباك ومتى مااستغنى صرتي والكنب واحد لاتستغربين من تكاثر فصيلة
سي السيّد بالمجتمع ..

الظاهرة موجودة بكثرة في المجتمع ولانعمم
أدلوو بدلوكم بكل رقي كما عهدتكم ..
دمتم بعيداً عن التسلط ..

14-01-2012, 05:11 PM

صقر
يسسسلمووووو يالغلا
ننتظر ابداعك وجديدك

14-01-2012, 06:05 PM

وصراحة والله متت ضحك وأنا أقرأ الموضوع
بس أي
كلام صحيح مية المية
وأكيد عنترية الرجل نابعة من التربية والنشأة يلي نشأ عليها
الزوج أولها تكون الزوجة بأول حياتها ما بدها تزعله لزوجها على شي صغير
وهو خلص يتعود على هالشي
بس صراحة ما بحب متل هالزوج اللي دمه تقيل وأناني
وكمان لازم يكون للزوجة شخصيتها المستقلة مهما كانت تحب زوجها ولازم تناقش وتختار الإشيا الخاصة فيها بنفسها
ما في مانع تاخد رأيه
بس القرار الأخير يكون لالها
ونفس الشي الزوج مع زوجته
وكمان ما بأيد أن الزوجة تطلع كل أسرار عيلتها لزوجها
سي محمد*
يعطيك العآفية
ودي وشذى وردي
إحترامي وتقديري

'

14-01-2012, 06:28 PM

هلا منورين حبايبي

ودي لروحكمـ

أدوات الموضوع
عرض نسخة للطبع أرسل هذا الموضوع إلى صديق
أنماط العرض
النمط الخطي الانتقال إلى النمط المختلط الانتقال إلى النمط الموضوعي

إعلانات نصية :
تويتر - twitter	فيسبوك - facebook	العاب ضمى نجد
يوتيوب ضمى نجد	جالري ضمى نجد	شات ضمى نجد الصوتي